Un libro che raccoglie le testimonianze dei nostri vecchi sulla tradizione dei tomats e degli strits, le caratteristiche delle maschere di carnevale in legno e i contrasti delle comitive festose che indossavano i tomats per vivere il tempo del “mondo alla rovescia”.
Presentazione
O vin metût adun in chest libri lis testemoneancis dai nestris vecjos su la tradizion dai tomàts e dai strîts, lis carataristichis mascaris di carnavâl in len e i contrascj personificâts cun vivarose gjonde, satiriche e soradine, des fiestosis comitivis che si metevin sù i tomàts par vivi il timp dal ”mont par ledrôs”.
A devin vite ai paîs lì che si viveve la fieste di ducj, zovins e vecjos, unîts te stesse ridade liberadorie, ch’e savoltave la miserie in ligrie, i sotans in sorestants, i voltâts di cjâf in savints, ch’e butave in place, in muse a ducj, la veretât e la sbeleade, ch’e meteve in comun i ûfs e il salamp, la farine e il vin, il cjant e la ridade, il zûc indiaulât dai bai e des contrafazions … il savê, lis contis, lis esperiencis di vite: il lâ pal mont, lis miseriis, lis dificultâts, la tragjedie des vueris, lis cognossincis e i valôrs … O vin cirût di tornâ a tiessi, in marilenghe, vierte e di valôr, il fîl des contis che al pei i nonos ai nevôts.
E volût meti a gnûf il ricuart di abii intaiadôrs, come Guido Boezio, Riccardo Floreani e Giovanni Nicoletti, di Zomeàis; Aldo Micco, Attilio e Ferruccio Vidoni, Fernando Vidoni, di Samardencje; Guido e Olvino Del Medico, Alceo Muzzolini, Francesco Muzzolini, Remo Toso, Antonio Vidoni, di Cuie; Lodovico, Cesare, Arrigo, Tullio e Ubaldo Toso, di Çucje. E meti in valôr cui ch’al va indenant in cheste art e al intaie vuê i tomàts: Remo Del Medico a Cuje, Giovanni Floreani a Zomeàis, Sergio Micco a Samardencje, Luigi Revelant a Nanarià, Dino Vaccari a Vulpins, e forsit cualchidun altri ancjemò che no sin a cognossince. E ancjemò sustignî il tornâ a nassi dai strîts, dulà che tai ultins agns si son metûts in mostre lis compagniis di Ciseriis, Zomeàis e Cuie e che vuê a viodin impegnâts i zovins da “Il Scùmul”, la compagnie di Samardencje.
E marcâ il contribût dal grop folcloristic “Chino Ermacora” che si è inspirât ai strîts te coreografie dai “Tomàts”, puartâde cun sucès tai cinc continents, lì che i balarins a metin intorsi lis mascaris di len e un carnavâl plen di vite al pare vie la vecje befane. E, come par chei altris tescj publicâts, che aromai a constituissin une piçule golaine, l’intenzion no je dome di documentâ, il desideri e l’ambizion a son chei di sustignî il cjapâ pît di gnovis semencis intune tradizion che no si consumi polvarose in se stesse, ma che sei humus vivarôs pal svilup de nestre comunitât.
Il Sindic
Lucio Tollis
L’Assessôr al Turisim
Sergio Ganzitti